نصائح قبل السفر الى الامارات - تأشيرة زيارة

فى الفتره اللى فاتت فيه عدد كبير من الاسئله والاستفسارات كانت بتوصلنى بخصوص السفر للامارات للبحث عن عمل...

كانت الاسئله كلها بتتمحور في 👇👇👇

- السفر حيتكلف كام؟؟
- حسكن هناك فين وبكام؟؟
- الحياه غاليه؟؟
- حدور ازاى وفين؟؟
- هل فرصة الشغل مضمونه ١٠٠٠٪؟؟

وعلشان انا مبكرهش فى حياتى قد الفتي والفتايين، سألت شباب زيكم نجحوا فى تجربة البحث عن شغل هناك وأمورهم أستقرت جدااا...

وده ملخص التجربه👇👇

مدة الزيارة :

الزيارة مدتها اسبوعين أو شهر أو 3 شهور بس طبعا لا الاسبوعين ولا الشهر هيكفيك ف بتطلع زيارة 3 شهور ..

تكلفة التأشيرة :

لو عندك حد فى الامارات خليه يبعتهالك هتبقي اوفر من مصر بس ممكن تشوف سعر الدرهم و تقارن انهي ارخص تتبعتلك من الامارات ولا تجيبها انت من مصر...
الفيزا بتتكلف لو من الامارات في حدود "1100-12000" درهم " كحد اقصي،أما لو من مصر حاليا اعتقد وصلت 3500 - 4000 جنيه "مش متأكد" ..

تكلفة الطيران :

حسب الشهر اللي هتسافر و حاول بقدر الامكان تبعد عن المواسم زي الاعياد و رمضان والمناسبات دى، لأن الطيران سعره بيختلف من شهر لاخر ومن طيران للتانى...

افضل شهور تيجي فيها البلد " تبقي جوا البلد فيها " شهر 10 لحد شهر 2 احسبها بحيث انك ميجيش عليك رمضان وانت هنا ..

السكن :

لو عندك حد تقعد عنده قريبك و مش هتدفع زي خالك عمك كلام من دا هيوفر كتير اوي عليك ..
طيب لو معندكش ؟!
يبقي السكن هيكلفك من 750 ل 1000 " درهم " شهريا متوسط 2500 فال 33 شهور وفي دبي حاول تشوف سكن قريب من المترو ..

المصاريف الشهريه :

لو انت مشيت علي قدك لا تحرم نفسك ولا تصرف ببذخ حيكفيك فالشهر من 1000 - 1200 درهم مصاريف ايدك و اكلك و مواصلاتك ..

المواصلات :

بلاش تركب تاكسيات الا للضرورة عشان غالية لو انت ف دبي قضيها مترو ولو ف ابوظبي اركب الباص الكبير اد ماتقدر هو بياخد وقت اطول بس اوفرلك ..

شوية نصايح مهمة :

قبل اي حاجة اعرف انك لما تيجي هنا هتاخدلك اسبوع تايه و حاسس انك بتضيع وقت و مش عارف تعمل ايه دا شعور طبيعي خرج نفسك منه.. وأوعي تيأس ...
 مش معني انك فضلت اسبوعين او شهر او شهر و نص مجالكش انترفيو تقول خلاص انا همشي...

بالتجربه فيه ناس بتلاقي من اول اسبوع و ناس تانيه بتلاقي في الشهر التالت.. اوعي تيأس اوعي تيأس ..

إرشادات التوفير

1- اهم حاجة تنظم وقتك و تعرف انك مش رايح تأنتخ و تتفسح طول الوقت لا انت رايح تجيب عقد شغل و تشتغل ف بلاش تضيع مصاريفك ف خروجات و فسخ " ملهاش لزمة " مبقولكش متخرجش ، لا اخرج بس فالمعقول لان البلد هنا مغرية جدا للمصاريف و الخروجات ..
2- حاول تجيب اكل معاك الحاجات الخفيفة للفطار والعشا عشان توفر مصاريفك هنا ..
3- انت جاي لهدف معين حاول تركز فيه يعني لو لاقيت سكن ب 8000 يبقي كويس اسكن فيه مش لازم تقعد ف جناح لوحدك ..
44- تصحي من بدري وتنزل بدري عشان تلحق الشركات من اول ماتبدأ شغلها ..

ازاي تلاقي شغل :

1- مهم جدا جدا جدا جدا شكل الـ CV و المحتوي ويظل المحتوي اهم من الشكل كمان ..
لازم تكون كاتبلهم CV محترم و مركز اوي علي نقط قوتك والجزء technical والجزء ال  practical بتاعك و خبرتك " و متزودش كلمة عشان كل كلمة بيسألوك فيها " بيمسك الـ CV فالانترفيو و يسألك فاللي انت كاتبه.. 

2- حضرتك من قبل ماتيجي مصر بتجهز قائمه بأسامي الشركات بتاعت مجالك وتخصصك و بتقسهم مناطق دبي ، ابوظبي ، الشارقة لان دول 95% اللي هتلاقي فيهم شغل بالذات بتوع هندسة و تجارة فإهتم بال 3 مدن دول ..

وفى نهاية البوست حتلاقى القائمه دي بكل الشركات اللي هنا ف الامارات كلها ومتقسمة كمان، كل اللي عليك بس تطلع ف ملف وورد او تكتب ف ورقة الشركات بتاعت مجالك كل امارة لوحدها يعني تكتب دبي و تكتب تحتها الشركات بعناوينها بايميلاتها، ابوظبي و تكتب تحتها و هكذا و الاماكن جوا المدينة نفسها تقسمها يعني مثلا زي القاهرة بتكتب اللي ف مدينة نصر لوحده بحيث تنزل تخلصهم ف يومين تلاتة و اللي في التجمع لوحده و تنزل تخلصهم و هكذا دي من اهم النقط عشان توفر وقت و فلوس ..

3- اول مابتيجي بتنزل تعمل اعلان في الجرايد اللي ليها انتشار وليها اسم و دا بيفرق جدا معاك و بتختار الايام اللي ينزل فيها الاعلان بعيد عن خميس جمعة و سبت يعني تقوله عايز الاعلان يبقي من الاحد للاربعاء و اهم الجرايد دي الجولف نيوز ، الوسيط ..

كذلك لازم تتابع بشكل يومى صفحات الوظايف الخاليه فى الجرايد وكذلك صفحات الفيس الموجوده فى نهاية البوست ..

4- بتبعت الـ CV عالايميل بتاع الشركة و بتطبعه مثلا 50 نسخة و بتنزل تروح للشركة نفسها كمان لان ساعات الايميلات بتكون غلط او اتغيرت او مش ايميل ال hr نفسه فبتروح تقدم الـ CV باليد وهنا عندك حاجز من اتنين👇

الاول: انهم بيستلموا الـ CV باليد عادي هتروح و تقوله عايز اقابل الاتش ار وتحاول تقابله لو مرضاش سيب الـ CV مع الريسيبشن و امشي ..

التاني: انهم مبياخدوش الـ CV باليد وساعتها بيديلك ورقة فيها ايميلات الشركة أو حتطلبها أنت منه ..

5- كل الكلام اللي فوق دا ملوش اي لزمة لو الانجلش بتاعك ضعيف لو انت مؤهل عالي لازم عالاقل يبقي انجلش كويس تعرف تتعامل بيه عشان 70% من البلد هنا اجانب " فلبينين و هنود و استراليين و جنسيات كتير غير عربية "

فقبل ما تفكر تسافر لازم تبدأ بأي طريقة فى تحسين الانجلش بتاعك ..

6- لو شركة كلمتك و حددتلك انترفيو ادخل علي النت و اعرف معلومات عن الشركة دي ولو حاجات بسيطة بحيث لو سألك تعرف ايه عن الشركة؟؟ او سؤال شبيه بكده تعرف تجاوب متقولش معرفش او اول مرة اسمع عنها حاول تبينله " من غير أفورة و فذلكة " انك عندك خلفية بسيطة عن المكان اللي انت رايحه ..

7- التزم بمواعيدك دايما ..

8- لو اتقبلت و جالك offer من الشركة اقراه كويس اوووي قبل ماتمضيه و تبعته لهم و متستعجلش و تفرح انك اتقبلت شوف راتب كام و امتيازاته ايه و بعد كده اسأل كذا حد عايش فالبلد هل دا كويس كبداية ولا لا ، هيعيشك لو عالاد فالاول كده ولا لا ..